बागलुङ
लागुऔषध दुरुपयोग तथा ओसारपसार विरुद्धको अन्तर्राष्ट्रिय दिवसको अवसरमा सञ्चालन भइरहेको सचेतना अभियानका क्रममा बुर्तिबाङमा चार जना सवारी चालक पक्राउ परेका छन् ।
इलाका प्रहरी कार्यालय बुर्तिबाङले सप्ताहव्यापी रुपमा सञ्चालन गरेको सचेतनामूलक कार्यक्रमअन्तर्गत खप्तरीबाङ तथा बजार आसपासका क्षेत्रमा गरिएको सवारी चेकजाँचका क्रममा उनीहरुलाई पक्राउ गरिएको प्रहरीले जनाएको छ ।
इलाका प्रहरी कार्यालय बुर्तिबाङका प्रमुख प्रहरी निरीक्षक तिलक मानन्धरका अनुसार सवारी चालकहरुको लागुऔषध सेवन गरे/नगरेको परीक्षणका लागि गरिएको किट परीक्षणमा लागुऔषध प्रयोग गरेको देखिएपछि आवश्यक अनुसन्धान तथा कारबाहीका लागि जिल्ला प्रहरी कार्यालय बागलुङ पठाइएको हो ।
पक्राउ पर्नेमा ढोरपाटन नगरपालिका–४ खुङ्गाका २७ वर्षीय पुरन घर्ती मगर (लु १ ज ३९४ नम्बरको पिकअप जिप चालक), ढोरपाटन–३ पुर्कोटका २० वर्षीय ईशाक आचार्य (ग १ ज ७५६ नम्बरको पिकअप जिप चालक), ढोरपाटन–५ का २७ वर्षीय यम प्रसाद विक (ग १ ज ७१९८ नम्बरको पिकअप जिप चालक) र तमानखोला गाउँपालिका–४ का २५ वर्षीय अर्जुन सिर्पाली (ध १ त २९१ नम्बरको ट्याक्टर चालक) रहेका छन् ।
प्रहरीका अनुसार पछिल्लो समय लागुऔषध दुरुपयोग तथा ओसारपसार नियन्त्रणका लागि समुदाय तथा विद्यालयस्तरमा सचेतनामूलक कार्यक्रम, ट्राफिक सचेतना र सवारी चालक लक्षित चेकजाँच अभियानलाई निरन्तरता दिइएको छ ।
