बागलुङको ढोरपाटन नगरपालिका–३ स्थित चाचलघाटमा पुल निर्माणका लागि बजेट सुनिश्चित भएको छ । लामो समयदेखि स्थानीय नागरिकको माग र अपेक्षाको रुपमा रहेको उक्त पुल आगामी आर्थिक वर्षमा निर्माण सुरु हुने भएको हो ।
संघीय सरकारको स्थानीय पूर्वाधार विकास विभागमार्फत ७ करोड ४३ लाख रुपैयाँ लागतमा पुल निर्माणका लागि बजेट सुनिश्चित भएको छ । गण्डकी प्रदेश सभा सदस्य माननीय दोर्ण कुमार कुँवरको पहलमा संघीय सरकारमार्फत बजेट व्यवस्थापन भएको बताइएको छ ।
पुल निर्माण भएपछि ढोरपाटन नगरपालिका–३ का घोसा, सामा, कालापोल तथा वडा नम्बर ५ का नाथुरी, भैँसिखर्क लगायत आधा दर्जनभन्दा बढी गाउँका नागरिक प्रत्यक्ष लाभान्वित हुने भएका छन् ।
लामो समयदेखि पुल अभावका कारण आवतजावतमा समस्या भोग्दै आएका स्थानीयले पटक–पटक निर्वाचित जनप्रतिनिधिहरूसँग पुल निर्माणको माग गर्दै आएका थिए । अब भने बजेट सुनिश्चित भएसँगै नागरिकको वर्षौँदेखिको सपना पूरा हुने अपेक्षा गरिएको छ ।
तमानखोला नदीमाथि निर्माण हुने उक्त पुल ३१ मिटर लामो हुने बताइएको छ । पुल निर्माणका लागि छिट्टै टेन्डर प्रक्रिया अघि बढाइने गण्डकी प्रदेश सभा सदस्य दोर्ण कुमार कुँवरले जानकारी दिनुभयो ।
