२६ जेठ २०८३ ।
देविस्थान माध्यमिक विद्यालय, निसीखोला गाउँपालिका–१, देविस्थानको ६७ औँ वार्षिकोत्वस तथा अभिभावक दिवस सोमबार सम्पन्न भएको छ । गत जेठ १८ गतेबाट आन्तरिक तथा बाह्य कार्यक्रम सहित सुरु भएको कार्यक्रमको सोमबार निसीखोला गाउँपालिकाका अध्यक्ष सुर्य बहादुर घर्ति मगरको प्रमुख आतित्थ्यतामा भव्य कार्यक्रमका बिचमा सम्पन्न भएको हो । कार्यक्रमको अवसरमा प्रमुख अतिथि घर्तिले बोल्दै देविस्थान माध्यमिक विद्यालयले पछिल्लो समयमा शैक्षिक तथा भौतिक क्षेत्रमा निकै उल्लेखनीय प्रगति गरेकाले यसको सिको अन्य विद्यालयले पनि गर्न आवश्यक रहेको बताउनु भएको थियो । विद्यालयको शैक्षिक तथा भौतिक विकासका लागि सबै सरोकारवालाले हातेमालो गर्दै अघि बढ्नुपर्नेमा जोड दिनुभयो । विद्यालयलाई अझ व्यवस्थित, गुणस्तरीय र नमुना शैक्षिक संस्थाका रूपमा विकास गर्नका लागि गाउँपालिकाले आवश्यक सहयोग गर्ने प्रतिबद्धता समेत व्यक्त गर्नुभएको हो ।
त्यस्तै कार्यक्रमका विशिष्ट अतिथि निसीखोला गाउँपालिकाका उपाध्यक्ष प्रेम बहादुर घर्तिले बोल्दै दुरदराजमा रहेका विद्यालयले पनि दक्ष जनशक्ति उत्पादन गर्न सक्ने क्षमता राख्न सक्ने र त्यो क्षमता यहाँको विद्यालयले गर्न सक्ने विश्वास व्यक्त गर्नुभएको थियो । यसका साथै सोमबार नै जनस्तरबाट निर्माण गरिएको विद्यालयको आवासीय भवनको सहयोगी चन्दादाताबाट नै दिप प्रज्वलन गरी उद्घाटन गरिएको हो । त्यस्तै विद्यालयको वेवसाइटको हस्तान्तरण कार्यक्रम पनि सम्पन्न भएको छ । वेवसाइट निर्माणमा आर्थिक सहयोग गर्नुहुने विद्यालयका पूर्व प्रधानाध्यपक किरण पौडेल र आइटी इन्जिनियर विजय पौडेलले विद्याल परिवारलाई वेवसाइट हस्तान्तरण गर्नुभएको हो । वेवसाइट निर्माण भएपछि अब विद्यालयको हरेक गतिविधि वेसाइटमा गएर हेर्न सकिने भएको छ ।
कार्यक्रममा विद्यालयका प्रधानाध्यापक झग बहादुर क्षेत्रीले विद्यालयको आय–व्यय विवरणसहितको प्रतिवेदन प्रस्तुत गर्दै विद्यालयको समग्र विकासका लागि प्रत्यक्ष तथा अप्रत्यक्ष रूपमा सहयोग, सहभागिता र योगदान पुर्याउनुहुने प्रमुख अतिथि, विशिष्ट अतिथि, विद्यालय व्यवस्थापन समिति, शिक्षक अभिभावक संघ, आर्थिक समिति शिक्षक–कर्मचारी, अभिभावक, विद्यार्थी, पूर्वविद्यार्थी, शुभेच्छुक, सहयोगदाता, विभिन्न विद्यालयहरुबाट पाल्नुभएका विद्यालय प्रमुख तथा प्रतिनिधिहरु, अतिथि तथा स्थानीय समुदायप्रति आभार तथा धन्यवाद व्यक्त गर्नुभएको थियो । सबैको अमूल्य साथ, सहयोग, सुझाव र सद्भावकै कारण कार्यक्रम सफलतापूर्वक सम्पन्न भएको र आगामी दिनहरूमा पनि विद्यालयको शैक्षिक, भौतिक तथा सामाजिक विकासका लागि यस्तै सहयोग र सद्भाव प्राप्त भइरहने अपेक्षा रहेको प्रधाध्यापक क्षेत्रीले बताउनुभयो ।
वार्षिकोत्वको अवसरमा विद्यालयको भवन निर्माणमा सहयोग गर्ने चन्दादातालाई फूल माला, अविर, मायाको चिनो र सम्मान पत्रले सम्मान गरिएको थियो । त्यस्तै कार्य सम्पादनमा उत्कृष्ट कार्य गर्ने विद्यालयका शिक्षकहरुलाई मायाको चिनो र नगदसहित सम्मान गरिएको थियो भने विद्यालयलाई आर्थिक तथा भौतिक सहयोग गर्ने व्यक्तिलाई समेत मायाको चिनो प्रदान गरिएको हो ।
वार्षिकोत्सव अवसरमा सोमबार नै निसीखोला गाउँपालिका भित्रका विद्यालयहरुको कक्षा ६ देखि १२ सम्मका विद्यार्थीको सामूहिक नृत्य पनि सम्पन्न भएको हो । जसमा प्रभा मा.वि. निसीखोला ३ प्रथम, देविस्थान मा.वि. निसीखोला १ द्वितीय र ज्ञानेन्द्र मा.वि. निसीखोला ५ ले तृतीय स्थान हासिल गर्न सफल भएका हुन् ।
कार्यक्रमा गण्डकी प्रदेश सभाका पूर्व सदस्य खिमविक्रम शाही, निसीखोला गाउँपालिकाका पूर्व अध्यक्ष तारानाथ पौडेल, निसीखोला गाउँपालिकाका प्रशासकीय अधिकृत दिलिप कुमार चन्द, जनप्रतिनिधि, शिक्षाप्रेमी, अभिभावक, विद्यार्थी लगायतको उपस्थिति रहेको थियो । निसीखोला गाउँपालिका वडा नं. १ का वडा अध्यक्ष चन्द्रसिह रामजाली, निसीखोला गाउँपालिकाका शिक्षा शाखा प्रमुख विष्णु प्रसाद न्यौपाने लगायतको शुभकामना मन्तव्य रहेको थियो । शिक्षक अभिभावक सङ्घका अध्यक्ष शिव वि.क.को स्वागत मन्तव्य, विद्यालय व्यवस्थापन समिति अध्यक्ष भरत पुनको अध्यक्षता र विद्यालयका शिक्षक विनोद पौडेल र तिलक मल्लको सञ्चालनमा कार्यक्रम सम्पन्न भएको थियो ।
विद्यालयकाे वेवसाइट : devisthanmavi.edu.np
