spot_img

निसीखोलामा जात व्यवस्था विरुद्धको प्रशिक्षण कार्यक्रम 

बुर्तिबाङ,निसीखोला दलित सञ्जालको आयोजनामा निसीखोलाको जुग्जाखोलामा जात व्यवस्था विरुद्धको एक दिने प्रशिक्षण कार्यक्रम सोमबार सम्पन्न भएको छ ।


उक्त कार्यक्रमको उद्घाटन गण्डकी प्रदेश सभा सदस्य एवं प्रमुख अतिथि दिलमाया पौबीले गर्नुभएको थियो । उद्घाटन पश्चात कार्यक्रममा बोल्दै प्रमुख अतिथि पौबीले जातीय विभेद र छुवाछुतको कारण देशका दलितहरु नागरिक भएर पनि अनागरिक जस्तै भई बाँच्नु परेको बताउनु भएको छ । राज्यसत्ताले युगौंदेखि असमानता र विभेद गरेको भन्दै उहाँले दलितहरु अब भोट बैंक मात्र बन्ने होइन, मुक्ति र परिवर्तनको लागि एकजुट हुनुपर्ने बताउनु भयो । शिक्षित बनेर मात्र परिवर्तन सम्भव हुने भएकाले उहाँले सबैलाई शिक्षित र सचेत बन्नुपर्नेमा समेत जोड दिनुभयो । उहाँले स्थानीय जनताको विकासका साथसाथै दलित हक अधिकारको लागि आफूले प्रदेश सभामा निरन्तर आवाज उठाउने प्रतिवद्धता समेत व्यक्त गर्नुभएको थियो ।

त्यसैगरी कार्यक्रममा विशिष्ट अतिथि एवं निसीखोला गाउँपालिकाका उपाध्यक्ष प्रेम घर्ती मगरले समाजमा छुवाछुत र विभेद अन्त्य गर्न सके मात्र सभ्य समाजको निर्माण हुने बताउनु भयो ।

त्यसैगरी निसीखोला दलित संजालका सल्लाहकार एवं वडा नं. २ का वडा अध्यक्ष कुबिर विकले समाजमा अझैपनि जातीय विभेद कायमै रहेकाले राज्यले यसको अन्त्य गर्न नसकेको भन्दै जातीय विभेद र मुक्तिको लागि दलितहरु एक हुनुपर्ने बताउनु भयो ।

कार्यक्रमको दोस्रो सत्रमा प्रशिक्षकहरुबाट दलित हक, अधिकार र कानुनी व्यवस्था तथा जात व्यवस्था के हो ? समाजमा कस्तो असर पारेको छ लगाएत सम्बन्धि प्रशिक्षण दिइएको थियो । यसैक्रममा कार्यक्रममा बोल्दै विशिष्ट अतिथि एवं प्रशिक्षक राष्ट्रिय दलित अभियन्ता डा. मित्र परियारले राजनीतिक दलहरुले दलितहरुलाई आफ्नो सत्ता स्वार्थको लागि प्रयोग मात्र गरेकाले दलित आन्दोलन कमजोर भएकाले मुक्तिको लागि सशक्त दलित आन्दोलनको विकल्प नरहेको बताउनु भयो ।
त्यसैगरी कार्यक्रमका प्रशिक्षक एवं दलित अधिकारकर्मी लोकेन्द्र सुनारले संविधान र ऐन कानुनले छुवाछुत तथा जातीय विभेद अन्त्य गरेको भएपनि व्यवहारमा अझैपनि त्यसको अन्त्य हुन नसक्नु र कागजको पानामा मात्र सिमित हुनु दुखद् पक्ष भएको बताउँदै राज्य गम्भीर बन्नुपर्ने बताउनु भएको थियो । साथै उहाँले सशक्त र एकीकृत दलित आन्दोलनबाट मात्र दलितहरुको मुक्ति सम्भव भएकाले सबै दलित समुदाय एकजुट हुनुपर्नेमा जोड दिनुभएको थियो ।

त्यसैगरी कार्यक्रमका प्रशिक्षक एवं दलित अभियन्ता अशोक विश्वकर्माले हिन्दू वर्ण व्यवस्था र त्यसबाट सिर्जित धर्म, संस्कार, संस्कृति सबैले दलित समुदायलाई विभेद गरेकाले विद्यमान असमानताका सबै जन्जिरहरु नचुँडालेसम्म दलित मुक्ति सम्भव नभएकाले दलीय राजनीतिभन्दा माथि उठेर सबै दलितहरु एकजुट हुनुपर्ने बताउनु भएको थियो । उहाँले जसरी भारतमा डा.भीमराव अम्बेडकरले दलित आन्दोलनलाई सशक्त बनाएका थिए त्यसरी नै नेपालमा पनि अब सशक्त दलित आन्दोलनलाई अगाडि बढाउन आवश्यक रहेको बताउनु भएको थियो

उक्त कार्यक्रममा समाजसेवी ईद बहादुर रसाईली, असारी वि.क., रोदन विश्वकर्मा, अनिल विश्वकर्मा लगायतले शुभकामना मन्तव्य दिनुभएको थियो ।
निसीखोला दलित संजालका अध्यक्ष रोशन विश्वकर्माको अध्यक्षता रहेको उक्त कार्यक्रममा संजालका उपाध्यक्ष विनोद विश्वकर्माको स्वागत मन्तव्य रहेको थियो भने कार्यक्रमको संचालन संजालका सचिव सञ्जय सुनारले गर्नुभएको थियो ।

प्रतिक्रिया दिनुहोस

सम्बन्धित